Stërvitja ushtarake detare BALTOPS 2026 do të zhvillohet nga 4 deri më 20 qershor, me pjesëmarrjen e rreth 20 anijeve dhe afro 6.000 personelit ushtarak nga 15 vende.

Edhe pse numri i pjesëmarrësve është më i vogël krahasuar me vitin e kaluar, zyrtarët kanë bërë të ditur se kjo lidhet me angazhimet e vazhdueshme ushtarake në rajone të tjera, përfshirë Lindjen e Mesme dhe Arktikun.

Pavarësisht reduktimit të shkallës së saj, BALTOPS pritet të jetë stërvitja më e madhe detare në Detin Baltik gjatë këtij viti.

Manovrat do të nisin në pjesën perëndimore të Detit Baltik dhe më pas do të zhvendosen drejt lindjes, në zonën përreth ishullit suedez të Gotlandit.

Zyrtarët theksuan se sigurimi i rrugëve detare të komunikimit mbetet një nga objektivat kryesore të stërvitjes, si për nevojat ushtarake ashtu edhe për transportin tregtar.

Ndërkaq, ata vlerësuan se, pavarësisht tensioneve aktuale, nuk presin veprime nga Rusia që do të aktivizonin Nenin 5 të NATO-s, klauzolën e mbrojtjes kolektive të aleancës.