Presidenti rus Vladimir Putin është kapur duke folur për pavdekësinë gjatë një samiti me Xi Jinping dhe Kim Jong Un.

Putin, i cili ndodhet në Pekin me sundimtarin e Koresë së Veriut dhe dhjetëra udhëheqës të tjerë botërorë për të festuar 80-vjetorin e përfundimit të Luftës së Dytë Botërore, u kap në një bisedë të rrallë me të parin e Kinës, shkruajnë mediat e huaja.

Dyshja, të dy 72 vjeç, u dëgjuan duke biseduar për mundësinë e arritjes së pavdekësisë me transplantime organesh dhe procedura të avancuara mjekësore, së bashku me Kim Jong Un.

Xi i tha Putinit nëpërmjet një përkthyesi: “Më parë, njerëzit rrallë jetonin deri në 70 vjeç, por këto ditë në moshën 70 vjeç je ende fëmijë”.

Putin u përgjigj: “Organet njerëzore mund të transplantohen vazhdimisht. Sa më gjatë të jetosh, aq më i ri bëhesh dhe (mund) madje të arrish pavdekësinë”.

Xi tha në përgjigje: “Parashikimet janë se, këtë shekull, ka edhe një shans për të jetuar deri në 150 vjeç”.

Biseda e frikshme vjen në kontekstin e akuzave se Kina merr ilegalisht organe nga grupet minoritare në të gjithë vendin, duke përfshirë ujgurët, tibetianët, myslimanët dhe të krishterët.

Ekspertët e të drejtave të njeriut të OKB-së thanë në vitin 2021 se kishin informacion të besueshëm se grupet minoritare ishin të detyruara t’i nënshtroheshin testeve mjekësore dhe marrjes së organeve pa pëlqimin e tyre.

Ndërsa sa i përket Rusisë, vitin e kaluar shkencëtarët rusë u urdhëruan të gjenin një kurë për plakjen.

Ministria ruse e shëndetësisë u tha instituteve kërkimore të hetonin kura për “çrregullimet njohëse dhe shqisore, plakjen qelizore dhe osteoporozën, si dhe ilaçe për forcimin e sistemit imunitar”.

Kujtojmë se Kina priti dhjetëra udhëheqës botërorë për një paradë masive ushtarake në Sheshin Tiananmen.

Edhe pse, në pamje të parë, u organizua për të festuar 80-vjetorin e Luftës së Dytë Botërore, shfaqja 90-minutëshe ishte përpjekja e Pekinit për të shfaqur fuqinë e saj ushtarake ndaj pjesës tjetër të botës. /Telegrafi/