Izraelitët po shënojnë një vjetorin e sulmit më të përgjakshëm në historinë e shtetit të Izraelit. Sulmi i grupit militant Hamas para një viti më 7 tetor shkatërroi ndjenjën e sigurisë dhe nxiti luftëra në dy fronte, pa një epilog të qartë në horizont. Hamasi shënoi përvjetorin e sulmit duke lëshuar një numër raketash drejt Tel Avivit ndërkohë që Hezbollahu, grupi militant me bazë në Liban, u zotua se do të vazhdojë të sulmojë Izraelin. Hamasi po mban ende rreth 100 pengje, nga 250 që rrëmbeu, por mendohet se një e treta e tyre mund të kenë vdekur.

Në tërë Izraelin u mbajtën sot ceremoni përkujtimore për të shënuar përvjetorin e sulmit më të përgjakshëm në historinë e vendit.

Para agimit, qindra familje të viktimave të festivalit të muzikës Nova, të shoqëruar nga Presidenti izraelit Isaac Herzog, u mblodhën në vendin ku rreth 364 pjesëmarrës të festivalit u vranë dhe shumë të tjerë u morën peng.

Ndërkohë që dielli agoi, organizatorët lëshuan të njejtën muzikë që ishte ndërprerë para një viti kur filloi sulmi. Në orën 06 e 29 minuta të mëngjesit, orën e saktë kur Hamasi filloi sulmin, pjesëmarrësit mbajtën një minutë heshtje, e shoqëruar me vajin e një gruaje dhe jehonën e bombardimeve nga luftimet në Gazë disa kilometra tutje.

Vitin e kaluar, më 7 tetor, militantët e Hamasit vranë 1,200 izraelitë, shumica civilë dhe rrëmbyen 250 të tjerë.

Sulmi i befasishëm i grupit militant Hamas, që qeveria e Shteteve të Bashkuara e ka shpallur organizatë terroriste, i zuri izraelitët të papërgatitur, duke lëkundur besimin e tyre ndaj udhëheqësve të vendit dhe ushtrisë.

Pasojat e sulmit ende vazhdojnë të ndihen në tërë rajonin.

Militantët palestinezë në Gazë e shënuan një vjetorin e sulmit ndaj vendbanimeve izraelite duke hedhur pesë raketa në drejtim të Izraelit.

Një raketë u hodh edhe nga Libani në pjesën veriore të Izraelit.

Familjet e të rrëmbyerve që ende po mbahen në Gazë, u mblodhën para rezidencës së kryeministrit izraelit Benjamin Netanyahu në Jeruzalem.

“Një vit ankth. Zgjohesh në mëngjes, nëse ke arritur të flesh ndopak, jeton dhe pastaj shkon për të fjetur i vdekur”, thotë babai i pengut Liri, Eli Albag.

Kryeministri Netanyahu vizitoi memorialin kushtuar viktimave të 7 tetorit në Jeruzalem.

“Në këtë ditë, në këtë vend dhe në vende të shumta në mbarë vendin, kujtojmë të rënët, pengjet tona – të cilët jemi të angazhuar t’i kthejmë, heronjtë që u sakrifikuan në mbrojtje të atdheut. Përjetuam një masakër të tmerrshme para një viti, por u ngritëm si një komb luanësh”, deklaroi ai.

Ceremoni përkujtimore për t’u solidarizuar me Izraelin u mbajtën në tërë botën, përfshirë në Uashington.

Lufta në Gazë po vazhdon dhe Izraeli ndërkohë po lufton një luftë të re kundër Hezbollahut në Liban. Njëkohësisht konflikti me Iranin, i cili mbështet Hamasin dhe Hezbollahun, po përshkallëzohet duke e përkeqësuar edhe më shumë situatën në rajon.

Lufta në Gazë është lufta më e gjatë, më e përgjakshme dhe më shkatërruese në historinë e konfliktit izraelito-palestinez. Sipas autoriteteve në Gazë, rreth 42,000 palestinezë janë vrarë në konflikt, apo rreth 2 për qind e popullsisë së këtij territori./voa