Reshje të dendura, tajfune dhe përmbytje kanë goditur Indinë, Nepalin, Vietnamin dhe Bullgarinë, duke shkaktuar dhjetëra viktima e dëme të mëdha. Autoritetet kanë shpallur alarme dhe janë në garë me kohën për të shpëtuar jetët në rrezik.

Moti ekstrem ka përfshirë disa shtete aziatike dhe evropiane, duke shkaktuar dhjetëra viktima dhe dëme të mëdha infrastrukturore.

Në Darjeeling të Indisë veriore, reshjet e dendura dhe rrëshqitjet e dheut kanë lënë të paktën 20 të vdekur dhe kanë izoluar fshatra të tëra. Ura e hekurt Dudia është shembur, ndërsa autoritetet kanë shpallur alarm të kuq dhe po evakuojnë turistët me ndihmën e Forcave Kombëtare të Reagimit ndaj Fatkeqësive. Në Nepal shirat kanë shkaktuar përmbytje dhe rrëshqitje të dheut me pasoja të rënda.

Të paktën 47 persona janë konfirmuar të vdekur dhe disa të tjerë janë zhdukur. Qeveria ka shpallur dy ditë pushim kombëtar për t’u përqendruar në operacionet e shpëtimit, ndërsa rrugët kryesore drejt Katmandusë mbeten të bllokuara.

Në Vietnamin verior, autoritetet janë në gjendje gatishmërie për goditjen e tajfunit ‘Matmo’, i cili tashmë ka kaluar përmes Kinës jugore. Qyteti i portit detar, Hai Phong, ka ndalur të gjitha aktivitetet detare e turistike, ndërsa qindra ekipe janë vendosur përgjatë digave për të parandaluar përmbytjet.

Ndërkohë, edhe Bullgaria po përballet me pasoja të rënda nga moti ekstrem. Tre persona humbën jetën në përmbytjet që goditën resortin ‘Elenite’ në bregdetin e Detit të Zi, ndërsa autoritetet kanë shpallur Kod Portokalli për reshje të dendura në disa rajone të vendit.

Meteorologët paralajmërojnë se reshjet intensive do të vazhdojnë në ditët e ardhshme, me rrezik të shtuar për zona të ulëta dhe pranë lumenjve.