Sipas një raporti të Qeverisë së Afrikës së Jugut, vdekjet dhe infektimet nga virusi HIV/SIDA në këtë vend kanë shënuar rënie të vazhdueshme që nga viti 2007, transmeton Anadolu Agency (AA).

Në raportin e vlerësimeve të popullsisë në mes të vitit, institucioni i statistikave të Afrikës së Jugut tha se numri i vdekjeve ka rënë nga mbi 267 mijë në vitin 2007 në gati 127 mijë këtë vit.

Raporti theksoi se qasja ndaj ilaçeve antiretrovirale (ART) ka zgjatur jetëgjatësinë e shumë afrikano-jugorë, duke zvogëluar infektimet nga virusi HIV dhe vdekjet e lidhura me SIDA-n.

Në fillim të viteve 2000, nga kjo sëmundje vdiqën një numër i madh i njerëzve në vend ndërsa Qeveria e Afrikës së Jugut mohonte se HIV shkaktoi SIDA-n.

Në vitin 2008, administrata e re e udhëhequr nga presidenti i atëhershëm Jacob Zuma filloi një fushatë masive anti-SIDA, duke nxjerrë një program të madh trajtimi të HIV-it, që mundësoi miliona afrikanëve të sëmurë qasje në terapinë ART për të shpëtuar jetën.

Sipas vlerësimeve, Afrika e Jugut ka një nga problemet më të mëdha në botë të virusit HIV/SIDA me rreth 7.97 milionë njerëz të infektuar nga virusi, rreth 13,5 për qind nga 58 milionë banorë sa numëron vendi.