Ministrja e Arsimit, Shkencës, Teknologjisë dhe Inovacionit, Arbërie Nagavci vizitoi sot nxënësit pjesëmarrës me rastin e organizimit të Olimpiadës së përbashkët në lëndën “Gjuhë Shqipe”, në kuadër të bashkëpunimit arsimor mes Kosovës dhe Shqipërisë.

Gjatë kësaj vizite, Nagavci ka theksuar rëndësinë e bashkëpunimit arsimor mes Kosovës dhe Shqipërisë, duke vlerësuar Olimpiadën e përbashkët të Gjuhës Shqipe si një hap të rëndësishëm për promovimin e gjuhës dhe kulturës shqiptare dhe rezultat i një pune të gjatë dhe të suksesshme mes dy ministrive të arsimit

Ajo ka shprehur mirënjohje për përkushtimin e nxënësve dhe mësuesve në këtë iniciativë, duke theksuar se kjo Olimpiadë është një mundësi për të forcuar lidhjet kulturore dhe arsimore mes dy vendeve.

“Kjo Olimpiadë është një shembull i shkëlqyer i përkushtimit për ruajtjen e gjuhës shqipe dhe trashëgimisë kulturore. Pas tri fazave të suksesshme deri më tani, faza e IV në nivel kombëtar pritet të jetë kurorëzimi i këtij bashkëpunimi të frytshëm mes Kosovës dhe Shqipërisë”, ka thënë Nagavci.

Ndër të tjera, Nagavci tha se, faza finale, e cila do të mbahet më 10 prill 2025, është jo vetëm një garë, por edhe një mundësi për nxënësit që të ndajnë eksperiencat dhe njohuritë e tyre në një skenë më të gjerë./Arbresh.info/