Shtetasi malazez Mario Millosheviq, i cili është arrestuar muaj më parë në Prishtinë, ka sulmuar një të paraburgosur i cili gjendet në Burgun e Sigurisë së Lartë në Dyz. Burimet e “Zërit” bëjnë të ditur se Millosheviq i ka shkaktuar lëndime të rënda trupore të paraburgosurit Mica Uroseviq.

Një mal veprash penale me të cilat ngarkohet si: “Blerja, posedimi, shpërndarja dhe shitja e paautorizuar e narkotikëve, e substancave psikotrope dhe analoge” dhe “Mbajtje në pronësi, kontroll ose posedim të armës”, “Tentim arratisje nga Burgu i Sigurisë së Lartë” javë më parë nuk i kanë mjaftuar malazezit Mario Millosheviq që të mos përfshihet edhe në vepra tjera.

Millosheviq, i ashtuquajtur Mirosllav Kostiq, ditë më parë është përfshirë në një rrahje brenda Burgut të Sigurisë së Lartë në Kosovë, në të cilin po mbahet në paraburgim nga korriku i këtij viti.

Sipas burimeve të gazetës “Zëri” në ndihmë malazezit Mario Millosheviq i ka ardhur edhe shtetasi serb Strahinja Dankoviq, mirëpo Prokuroria Themelore në Prishtinë për këtë çështje është duke e hetuar vetëm Millosheviqin, i cili ka rrahur keq të paraburgosurin tjetër Mica Urosevi.