“Ende nuk e besoj dot, jam shumë i pikëlluar.” Këto ishin fjalët e para të aktorit kryesor në serialin “Ertugrul”, Engin Altan Duzyatan për median pasi humbi në një aksident shokun e tij të ngushtë Arda Oziri.

Mbrëmjen e së martës, Engin Altan Duzyatan dhe bashkëshortja e tij Neslişah Alkoçlar ishin për darkë në një restorant në Stamboll. Në dalje, ai u pyet nga gazetarët për vdekjen e hidhur të shokut të tij të klasës në Universitet dhe të setit të xhirimit në serialin “Ertugrul”.

“Humbja jonë është e madhe. Uroj që Zoti ta mëshirojë mikun tim të dashur. I uroj ngushëllime familjes dhe komunitetit të aktorëve. Ende nuk e besoj dot, jam shumë i pikëlluar”, tha Duzyatan, i cili luan rolin e Ertugrul në serialin me të njëjtin emër.

39-vjeçari Arda Oziri humbi jetën mëngjesin e së dielës pas një aksidenti me motor në Stamboll. Në vitin 2017 ai iu bashkua serialit Ertugrul ku luante rolin e Goktug, njeriut besnik të Sadetin Kopek.