Ministri i ri i brendshëm i Gjermanisë ka thënë se ai beson që “Islami nuk i përket” vendit, në kontrast direkt me kancelaren Angela Merkel.

Horst Seehofer ka qenë prej kohësh një zë kritik i politikave të refugjatëve të Merkelit, por që vetëm tani ka marrë një rol kyç në zemrën e koalicionit të ri, transmeton portali Arbresh.info.

Komentet e tij janë duke u parë si përpjekje për të fituar votuesit nga partia e së djathtës ekstreme Alternativa për Gjermaninë (AfD).

Kancelarja ishte e shpejtë në distancimin e saj nga komentet.

Në intervistën e tij me gazetën Bild, z. Seehofer tha se Gjermania ishte “e formësuar nga krishterimi” dhe se vendi nuk duhet të heqë dorë nga traditat e veta.

“Jo. Islami nuk i përket Gjermanisë. Gjermania është formësuar nga krishterimi,” tha ai.

“Myslimanët që jetojnë mes nesh, natyrisht i përkasin Gjermanisë … Kjo natyrisht nuk do të thotë që ne, nga një konsideratë e rreme për të tjerët, të heqim dorë nga traditat dhe zakonet tona.

“Myslimanët duhet të jetojnë me ne, jo pranë apo kundër nesh”.

Seehofer, i cili kryeson partinë simotër bavareze të Merkelit, CSU gjithashtu premtoi të rrisë dëbimet e azilkërkuesve të refuzuar./Arbresh.info/