Komuna e Podujevës nuk do ta ndërtojë objektin e hemodializës, projekt ky i planifikuar në bazë të kornizës afatmesme buxhetore 2015-2017.

Për të ishte paraparë edhe buxheti prej 200 mijë eurosh në vitin 2016. Një vit më vonë parashihej që e njëjta shumë të ndahej për blerjen e mjeteve të hemodializës.

Por në Kornizën e re nuk figurojnë këto projekte, raporton KTV.

Sipas opozitës, ky ndryshim nga ekzekutivi tregon se kjo komunë po qeverisë pa program politik dhe se nuk po i merr parasysh nevojat e qytetarëve.

Sipas Flakron Gashit, Agim Veliut nuk po intereson shëndeti i qytetarëve.

Por, drejtori i Shëndetësisë dhe Mirëqenës Sociale në Podujevë, Agron Hyseni, mos realizimin e këtij projekti e arsyeton me faktin se shkurtimet buxhetore që ka bërë Ministria e Financave kanë ndikuar në rënien e investimeve kapitale në komunë.

Komunës së Podujevës bartja e pacientëve që vuajnë nga sëmundja e veshkave, e të cilët i nënshtrohen dializës në Klinikën Nefronologjike në QKUK, i kushton plot 50 mijë euro në vit.

Sipas Hysenit, edhe po të ndërtohej ky objekt, shpenzimet e komunës përsëri nuk do uleshin, sepse mirëmbajta e aparaturës mjekësore për këtë sëmundje është e kushtueshme dhe se komuna e vetme nuk mund t’i mbulojë shpenzimet.