Shumë institucionet shëndetësore në vend punojnë pa protokolle mjekësore, derisa disa prej tyre shfrytëzojnë ato të shoqatave evropiane, raporton KTV.

E pikërisht mungesa e tyre është burimi i keqpërdorimeve me barna e me material shpenzues, pasi ato do të rregullonin llojin dhe sasinë e barit që do të përdoret.

Disa klinika të QKUK-së kanë bërë një zgjidhje të përkohshme, për të cilën duhet të marrin miratim nga institucioni më i lartë i shëndetësisë.

Ngjashëm kishin vepruar edhe një grup tjetër i punëtorëve shëndetësorë nga spitalet rajonale, por nuk arritën qëllimin.

Faik Hoti, zëdhënës i MSH-së, ka pranuar se krijimi i protokolleve është urgjencë, por thotë se ekipet e krijuara janë duke e bërë punën e tyre që t’i hartojnë sa më parë ato dokumente.

Ndërkaq mos unifikimi i këtyre dokumenteve me rëndësi ka mundësuar përshkrimin e barnave në mënyrë të ndryshme, varësisht nga dëshira e profesionistëve shëndetësorë.

Javë më parë KTV-ja ka raportuar se një lloj bari që përdoret në sasi prej 2000 copë në spitalin e Gjilanit, në spitalin rajonal të Vushtrrisë nuk përdoret fare.