Janë bërë tashmë 7 muaj kur Besnik Mustafa, djali i kryeministrit, po vazhdon ballafaqimin me Gjykatën.

Ai dhe 6 persona të tjerë akuzohen për keqpërdorim të detyrës zyrtare dhe falsifikim të dokumentit zyrtar. Në mesin e të akuzuarve janë edhe dy zyrtarë të ish-Ministrisë së Transportit, Postës dhe Telekomunikacionit, raporton KTV.

Të mërkurën, mbrojtja e Mustafës ka vazhduar të insistojë se çdo ditë e vazhdimit të kësaj procedure është e jashtëligjshme. Arsyetimi i tyre është se lënda tashmë është vjetërsuar dhe duhet të ketë parashkrim absolut.

Kryetari i trupit gjykues, që ka marrë vendim që disa vepra janë vjetërsuar për Sibush Hazirin e Hamzi Rrahimin, ka thënë se për veprën penale falsifikim për të pandehurit e tjerë do të marrë vendim në fund.

Këtë ai e ka arsyetuar se falsifikimi lidhet me veprën penale të keqpërdorimit të detyrës zyrtare.

7 të pandehurit akuzohen për vepra penale që ndërlidhen me një fluturim të anuluar të vitit 2009 nga Aeroporti i Prishtinës, transmeton Koha.net.

Besnik Mustafa, si menaxher në Bankën për Biznes, akuzohet për keqpërdorim të pozitës dhe falsifikim të dokumentit zyrtar, të një garancie bankare të dedikuar për pasagjerët.