“Kërcënimet nga terrorizmi janë tashmë një fenomen global dhe Kosova nuk bën përjashtim por as nuk është në shënjestër më shumë se vendet e tjera”, ka thënë komandanti i KFOR-it në Kosovë, Francesco Paolo Figliuolo, raporton KTV.

Duke folur për arrestimet e disa të dyshuarve për terrorizëm javën e kaluar në liqenin e Badovcit, Figliuolo ka përgëzuar Policinë e Kosovës, për të cilët tha se, kanë bërë një punë të jashtëzakonshme në parandalimin dhe reagimin ndaj këtij fenomeni.

Këto komente, ai i bëri në Deçan, me rastin e përurimit të një ure, që do t’i lidhë fshatrat e Deçanit, me rrugën kryesore që kalon rreth manastirit.

Megjithëse ishte i pranishëm ati Sava nuk mori pjesë në prerjen e shirit, ndërkaq sipas kryetarit të Deçanit, Rasim Selmanaj, kjo mund të jetë një revoltë e kreut të manastirit, pas vendimit që gjykata mori, për të mos i lejuar Manastirit administrimin e një prone publike.