Thaçi, i cili po qëndron për vizitë zyrtare në Romë, e ka falënderuar ministrin Gentiloni për mbështetjen e vazhdueshme të Italisë dhënë Kosovës, që nga koha e luftës, e cila rezultoi me një bashkëpunim të mirë politik mes dy vendeve, njoftoi MPJ.

“Do të dëshironim që ky bashkëpunim të thellohet edhe në rrafshin ekonomik”, është shprehur Thaçi, duke shtuar se “tanimë në Kosovë ka investitorë të suksesshëm italianë”. Ai ka ftuar që të inkurajohen edhe ndërmarrësit e tjerë që të investojnë në Kosovë.

Zëvendësministri e ka informuar ministrin Gentiloni se ministrat e Zhvillimit Ekonomik dhe Bujqësisë të Kosovës, Blerand Stavileci dhe Memli Krasniqi, do të vizitojnë Italinë këtë verë për të përgatitur nënshkrimin e disa marrëveshjeve konkrete të bashkëpunimit në sferën e ekonomisë, e që pritet të nënshkruhen në shtator, në “EXPO Milano 2015”.

Gjatë bisedës është folur edhe për bashkëpunimin mes dy vendeve në fushën e arsimit, si dhe në luftën kundër radikalizmit dhe terrorizmit, thuhet në njoftimin e MPJ-së së Kosovës.