Në hapjen e fushatës zgjedhore në Prizren, kandidati i Nismës për kryetar të kësaj komune, Zafir Berisha, është shprehur i bindur në fitoren e tij për t’i dhënë fund qeverisjes së PDK-së në Prizren.

Berisha ka premtuar zhvillim ekonomik, qeverisje të denjë, arsim më të mirë dhe shërbime shëndetësore më të mira, raporton KTV.

Berisha ka akuzuar qeverisjen aktuale të Prizrenit se po u mbledh haraç bizneseve.

Para qytetarëve të Prizrenit, kreu i Nismës Fatmir Limaj, ka kërkuar votën e qytetarëve për Zafir Berishën.

Limaj ka premtuar se me fitoren e Nismës në Prizren do të nisë ndryshimi i qeverisjes në Kosovë, ngase sipas tij, Kosova ka nevojë për qeverisje socialdemokrate.

Zgjedhjet lokale do të mbahen më 22 tetor. Kandidati i Nismës për Prizren, Zafir Berisha, do të jetë mund të garojë në këto zgjedhje, edhe pse KQZ’ja fillimisht ia kishte marrë këtë të drejtë, pasi Berisha ishte dënuar për kyçje ilegale të rrymës. Megjithatë, Gjykata Supreme rrëzoi vendimin e KQZ’së, vendim ky që shqetësoi edhe ambasadën amerikane në Prishtinë.