Siç informojnë nga shërbimi i Kuvendit, në ora 15 vazhdon seanca e tetë e Kuvendit, ku pas përfundimit do të vazhdojë seanca e gjashtë, ku pritet që të votohet shkarkimi i prokurorit publik, Marko Zvërlevski

Kryetari i Kuvendit, Talat Xhaferi, ka riplanifikuar seancën e sotme dhe në vend që të mbahet në ora 11, ajo është shtyrë për në ora 15.

Nga kabineti i Xhaferi thonë se shkak për zhvendosjen e terminit të seancës është pjesëmarrja në aktivitetet për nder të Ditës së ARM-së.

Në Muzeun Ushtarak, do të hapet ekspozitë kushtuar Jubileut “25 vjet Armata e Republikës së Maqedonisë”, në të cilën do të marrë pjesë edhe kryetari i Kuvendit.

Në ora 15, siç informojnë shëbimet e Kuvendit, do të vazhdojë seanca e tetë e Kuvendit.

Pas përfundimit të kësaj seance në Kuvendin e Republikës së Maqedonisë do të vazhdojë seanca e gjashtë, ku pritet që edhe të votohet për shkarkimin e prokurorit publik, Marko Zvërlevski, pasi mbrëmë përfundoi debati për këtë pikë të rendit të ditës. Pas përfundimit të seancës së gjashtë pritet që të vazhdojë seanca e pestë, ku do të debatohet për raportin për punën e Agjencisë për administratë si pikë e vetme e mbetur nga kjo seancë, transmeton Zhurnal.