Vazhdimi i sotëm i diskutimit për shkarkimin e prokurorit publik, Marko Zvrlevski, deri tani nuk ka sjellë diçka të re.

Deputetët e VMRO-DPMNE-së në vazhdimin e sotëm të seancës prezantuan një numër të madh lëvdatash për Zvrlevskin, njëkohësisht edhe sulmuan shumicën parlamentare për tema nga ekonomia, për zgjedhjet e kuadrove dhe tema tjera, përcjell Telegrafi Maqedoni.

Dimitar Stefanaxhija duke iu referuar ndryshimit të pozitës së drejtorisë në “Tanec”, ka recituar poezinë “Teshkoto” nga Bllazhe Koneski që ua përkushtoi punëtorëve kulturor në Maqedoni.

“Këto vargje ua kushtoj të gjithëve punëtorëve kulturor që t’i shqyejnë diplomat dhe t’i hedhin para Ministrisë së Kulturës sepse prej sot drejtor i “Tanecit” është njeri me shkollë të mesme të ndërtimtarisë. Sot diskutojmë për Zvrlevskin që të fshihet takimi i Zaevit me Dinko Vellev – gjuetari bullgar i emigrantëve”, tha Stefanaxhija.

Kërsto Jovanovski nga VMRO-DPMNE nga foltorja e Kuvendit theksoi se nuk njeh prokuror më profesional se Marko Zvrlevski.

Ndërsa deputeti opozitar Ivan Ivanov nga foltorja e Kuvendit tregoi barcoletë me të cilën dëshroi të potencojë se pushteti i ka shitur interesat kombëtare për interesa personale.