Majlinda Bregu ka dalë sërish kundër grupit të Partisë Demokratike, pak pas mbledhjes së tij dhe ka shpërthyer ndaj kryetarit Basha në lidhje me vendimin për të mos u futur në zgjedhjet e 18 Qershorit.

Bregu është shprehur edhe një herë tjetër publikisht kundër bojkotit të zgjedhjeve.

“Mos zhvillimi i zgjedhjeve, s’mund të konsiderohet fitore”,- tha ajo për mediat teksa bëri një deklaratë të fortë, kur tha se, tani detyra e çdo demokrati, është rindërtimi i PD-së.

“Kam frikë se në mos u shpiktë ndonjë jetë politike në Mars, dalja ose vazhdimi i luftës apo mosbindjes civile jashtë institucioneve nuk e bën PD më të madhe dhe nuk mund te hesht dot e të mos e them këtë shqetësim që kam sot.

Shpresoj që ky shqëtësim të mos jetë vetëm i imi dhe edhe në qoftë i imi dhe i disa kolegëve të tjerë, nuk e them që kam hallin tim apo të kryetarit të PD…

Ne do kemi mundësinë të gjejmë një punë, por është halli i atyre demokratëve që sot s’do ndjehen të përfaqësuar në parlamentin e ardhshëm.

Jam e bindur që 18 qershori s’do jetë ditë zgjedhjesh, nga ana tjetër jam po aq e bindur se, 18 qershori s’mund të keqpërdoret nga Edi Rama si të jetë 29 nëntori i Enver Hoxhës.

Jam e bindur se pas kësaj situate detyra kryesore e çdo demokrati është rindertimi i Partisë Demokratike”.