Në Kosovë është duke u kërkuar nga përfaqësues të ndryshëm politikë bërja e një ligji për rregullimin e medieve online, raporton KTV.

Kjo për shkak të problemeve të shumta në këtë fushë. Duke u nisur nga mos respektimi i të drejtave të autorit e deri te standardet profesionale, është krijuar nevoja e vetërregullimit të kësaj fushe.

Ekspertja ndërkombëtare për rregullimin e medieve, Adeline Hulin, thotë se duhet shmangur rregullimin ligjor.

Gazetari Artan Mustafa, tha se mediet duhet të vetërregullohen gjithmonë duke u nisur nga mbrojtja e parimeve profesionale. Problemi kryesor, krahas shumë problemeve të tjera në fushën e medieve online, është edhe mosrespektimi i të drejtave të autorit.

Numri i madh i medieve elektronike në Kosovë ka krijuar një treg jo fort të qëndrueshëm.

Mediet e fuqishme dëmtohen vazhdimisht nga vjedhja e lajmeve nga portale të ndryshme, duke mos respektuar të drejtën e autorit.

Deri në këtë fazë me mediet online dhe rastet e tyre është marrë vetëm Këshilli i Medieve të Shkruara.