Një ngjarje e rëndë ka tronditur Serbinë, ku një grua 28-vjeçare ruse, e shpallur e zhdukur që nga fundi i muajit korrik, është gjetur e pajetë brenda një valixheje në një kanal pranë Beogradit. Për vrasjen e saj është arrestuar një shtetas turk 25-vjeçar, i cili dyshohet se po përpiqej të largohej nga vendi.

Trupi i viktimës u zbulua mbrëmjen e së enjtes nga banorë të zonës pranë një kanali në Padinska Skela, në periferi të Beogradit. Pas ekzaminimit mjeko-ligjor, autoritetet e identifikuan viktimën si Lyudmila Turkova, shtetasja ruse që kërkohej prej disa ditësh.

Sipas Ministrisë së Brendshme të Serbisë, i dyshuari kryesor është një shtetas turk 25 vjeç, i cili u arrestua në aeroportin e Beogradit ndërsa po tentonte të largohej nga Serbia. Identiteti i tij nuk është bërë publik.

Nga hetimet paraprake ka rezultuar se 28-vjeçarja dyshohet se është vrarë në orët e para të 26 korrikut në një apartament me qira në lagjen Borça. Më pas, autori i dyshuar besohet se e vendosi trupin në një valixhe, e transportoi deri te Kanali Vizelj dhe e braktisi aty në përpjekje për të fshehur gjurmët e krimit.

Lyudmila Turkova ishte zhdukur mbrëmjen e 25 korrikut, pasi kishte ndërprerë çdo kontakt me miqtë e saj. Pas denoncimit të zhdukjes, autoritetet nisën hetimet, të cilat çuan në zbulimin e trupit dhe arrestimin e të dyshuarit.

Çështja tashmë është në duart e Prokurorisë serbe, e cila po vijon hetimet për të zbardhur plotësisht rrethanat dhe motivet e krimit.