Kupa e Botës 2026 do të nisë pas pesë ditësh, më 11 qershor, dhe do të zgjasë deri më 19 korrik. Turneu do të organizohet për herë të parë në histori në tre shtete njëkohësisht: Shtetet e Bashkuara, Kanada dhe Meksikë, në 16 qytete pritëse.

Në total do të zhvillohen 60 ndeshje, ndërsa fazat finale, përfshirë çerekfinalet, gjysmëfinalet dhe finalen, do të luhen në Shtetet e Bashkuara. Kanadaja dhe Meksika do të presin nga 10 ndeshje secila.

Turneu i këtij viti sjell edhe një sërë rregullash dhe risish të reja të vendosura nga IFAB dhe FIFA, të cilat pritet të ndryshojnë ndjeshëm rrjedhën e lojës.

Një nga ndryshimet kryesore lidhet me komunikimin e lojtarëve në fushë, ku mbulimi i gojës gjatë bisedave do të ndalohet dhe mund të ndëshkohet me karton të kuq.

Risi të tjera përfshijnë zgjerimin e kompetencave të VAR-it, masa më të rrepta për vonesat gjatë rivënieve dhe goditjeve standarde, si dhe rregulla të reja për zëvendësimet dhe trajtimin e lojtarëve të dëmtuar.

Gjithashtu, turneu do të përdorë teknologji të avancuar, përfshirë inteligjencën artificiale për analizë taktike dhe sistemin gjysmë-automatik të pozicionit jashtë loje, si dhe masa të përforcuara sigurie në stadiume.

Kupa e Botës 2026 do të jetë gjithashtu e para me 48 ekipe kombëtare, të ndara në 12 grupe, ku dy vendet e para të çdo grupi dhe tetë skuadrat më të mira të vendeve të treta do të kalojnë në fazën eliminatore.