Trainkos ka njoftuar se ka pranuar pesë vagonë të udhëtarëve të riparuar me financim nga buxheti i Kosovës, në kuadër të projekteve kapitale të miratuara nga Ministria e Ekonomisë.

Sipas njoftimit, vagonët janë vendosur në parkun e kompanisë dhe, pas përfundimit të procedurave administrative nga ARH, do të lëshohen në operim.

“Ky investim i rëndësishëm do të ndikojë drejtpërdrejt në rritjen e cilësisë së shërbimeve për qytetarët dhe në fuqizimin e transportit hekurudhor si një alternativë e sigurt, e besueshme dhe efikase”, thuhet në njoftim .

Trainkos thekson se riparimi i tyre mundëson operimin e secilit vagon edhe për rreth 800 mijë kilometra shtesë, duke zgjatur jetën funksionale të tyre dhe duke rritur kapacitetet e transportit hekurudhor.

Kompania njoftoi gjithashtu se udhëtarët tashmë mund të paguajnë biletat edhe përmes POS-it me kartela bankare, duke lehtësuar procesin e pagesës gjatë udhëtimit.