Kryeministri i Shqipërisë, Edi Rama, ka reaguar pas ngjarjes së rëndë në Maliq, ku gjatë një operacioni policor humbi jetën një efektiv i Policisë së Shtetit dhe u plagos një tjetër.

Përmes një reagimi publik, Rama bëri të ditur se ngjarja ndodhi gjatë një operacioni për kapjen e një të arratisuri të shumëkërkuar, i cili prej vitesh i ishte shmangur drejtësisë në zonat malore të Korçës, shkruan Arbresh.info.

“Gjatë një operacioni të guximshëm për kapjen e një të arratisuri të shumëkërkuar, i cili për vite me radhë i ishte shmangur ligjit në malet e Korçës dhe kishte arritur vazhdimisht t’i shpëtonte rrethimit të forcave të rendit, një oficer policie humbi jetën dhe një i dytë u plagos, ndërsa pasi hapi zjarr ndaj tyre, edhe krimineli u plagos dhe u kap”, shkroi Rama.

Kryeministri shprehu ngushëllimet për familjen e efektivit të vrarë dhe uroi shërim të shpejtë për policin e plagosur.

“Nderim i përjetshëm për dëshmorin e atdheut, ngushëllime familjes dhe shërim të shpejtë oficerit tjetër”, theksoi ai.

Rama kërkoi gjithashtu dënimin maksimal për autorin e sulmit ndaj efektivëve të policisë.

“Dënim maksimal për të arratisurin e shumëkërkuar dhe respekt maksimal për Policinë e Shtetit, e cila nuk do të ndalet kurrë në misionin e saj”, u shpreh kryeministri./Arbresh.info/