Prokuroria Speciale e Republikës së Kosovës ka ndaluar për 48 orë një person me inicialet S.D., në kuadër të hetimeve për rastin e njohur si “Laboratori ‘25”.

Sipas njoftimit të prokurorisë, i dyshuari është paraqitur vullnetarisht gjatë ditës së sotme në Policinë e Kosovës në Prishtinë, ku më pas është intervistuar nga autoritetet kompetente.

Pas ndërmarrjes së veprimeve procedurale, prokurori special ka nxjerrë aktvendim për ndalimin e tij nën dyshimin për veprat penale “Pjesëmarrja ose organizimi i grupit kriminal të organizuar” dhe “Falsifikimi i dokumentit”.

Rasti “Laboratori ‘25” lidhet me një laborator të sofistikuar për prodhimin e dokumenteve të falsifikuara, ku sipas hetimeve dyshohet se janë prodhuar dokumente për mbi 50 shtete të ndryshme të botës. Në aksionet e mëhershme, policia kishte sekuestruar aparatura dhe materiale të ndryshme që përdoreshin për falsifikimin e pasaportave, patentë-shoferëve dhe dokumenteve të tjera zyrtare.

Prokuroria Speciale ka bërë të ditur se hetimet janë ende në zhvillim dhe se, në bashkëpunim me Policinë e Kosovës, do të vazhdojnë të ndërmerren veprime të tjera hetimore për zbardhjen e plotë të rastit.