Irani ka zgjeruar për herë të dytë që nga nisja e luftës me SHBA-në dhe Izraelin zonën që e konsideron si Ngushticën e Hormuzit, duke e kthyer atë në një “zonë të gjerë operative” me rëndësi të shtuar ushtarake.

Lajmi u bë i ditur nga Mohammad Akbarzadeh, zëvendësdrejtori politik i Marinës së Gardës Revolucionare Islamike, i cili deklaroi për agjencinë iraniane Fars se Teherani nuk e sheh më Ngushticën e Hormuzit si një rrip të ngushtë detar pranë disa ishujve.

“Në të kaluarën, Ngushtica e Hormuzit përcaktohej si një zonë e kufizuar rreth ishujve si Hormuzi dhe Khenghami, por sot kjo pikëpamje ka ndryshuar,” deklaroi Akbarzadeh.

Sipas tij, zona strategjike tashmë shtrihet nga qyteti iranian i Jaskut në lindje deri në ishullin Sirit në perëndim, duke krijuar një hapësirë shumë më të madhe operative për forcat iraniane. Agjencitë iraniane Fars dhe Tasnim raportuan se gjerësia e zonës është zgjeruar nga 20-30 milje në rreth 200-300 milje.

Ngushtica e Hormuzit konsiderohet një nga rrugët më të rëndësishme energjetike në botë, pasi rreth një e pesta e prodhimit global të naftës dhe gazit natyror të lëngshëm kalon përmes saj. Ajo shërben si dalje kryesore për eksportet energjetike të vendeve të Gjirit Persik, përfshirë Arabinë Saudite, Irakun dhe Katarin.

Më 4 maj, Marina e Gardës Revolucionare publikoi një hartë të re të zonës së kontrollit, e cila përfshinte edhe pjesë përgjatë vijës bregdetare të Emirateve të Bashkuara Arabe në Gjirin e Omanit. Me njoftimin e fundit, zona e pretenduar operative duket se është zgjeruar edhe më tej./rtsh.al/