Mesfushori i ri holandez, Kees Smit, po tërheq gjithnjë e më shumë vëmendje në futbollin evropian falë paraqitjeve mbresëlënëse me AZ Alkmaar.

20-vjeçari nga Heiloo po konsiderohet si një nga talentet më premtuese të momentit.

Interesimi për të nuk mungon as nga klubet elitare. Së fundmi, emri i tij është lidhur me FC Barcelona, ndërsa vlerësime të mëdha ka marrë edhe nga selektori i Holandës, Ronald Koeman.

Ky i fundit e krahasoi Smitin me dy mesfushorë të njohur, duke thënë se “ka diçka nga Pedri dhe diçka nga Frenkie de Jong”.

Nga ana tjetër, ish-futbollisti i njohur holandez, Rafael van der Vaart, ka një mendim tjetër për të ardhmen e talentit të ri.

Duke folur në emisionin “Rondo” në Ziggo Sport, ai deklaroi se Smit ka potencial për të përfunduar te Real Madrid.

“Smit është një lojtar jashtëzakonisht i mirë. Shpesh nxitojmë të themi për dikë se është i mirë, por në këtë rast ai është vërtet shumë i mirë. Nëse vazhdon kështu, pa dyshim do të përfundojë te Real Madridi ose në ndonjë nga klubet më të mëdha në botë”, u shpreh Van der Vaart.

Ai shtoi se e vetmja gjë që i duhet të përmirësojë është menaxhimi i presionit, por theksoi se Smit duket një futbollist me këmbë në tokë dhe personalitet të qëndrueshëm./Arbresh.info