NASA ka publikuar imazhet e para me rezolucion të lartë të Tokës, të kapura nga ekuipazhi i Artemis II gjatë udhëtimit të tyre rreth Hënës.

Komandanti i misionit, Reid Wiseman, bëri këto fotografi “spektakolare” pas djegies së fundit të motorit, që i vendosi në trajektoren drejt Hënës.

NASA publikon foto të reja të Tokës nga hapësira

Imazhi i parë, i quajtur Hello, World, tregon Oqeanin Atlantik, atmosferën e hollë të Tokës, dhe aurorat në polin verior dhe jugor.

Pamja tregon Tokën të përmbysur, ku Sahara Perëndimore dhe Gjeria Iberike shfaqen në të majtë, ndërsa pjesa lindore e Amerikës së Jugut shfaqet në të djathtë.

NASA identifikoi planetin e ndritshëm në pjesën poshtë-djathtas si Venusi. Fotot u kapën pas djegies trans-lunare, që nxori anijen kozmike Orion jashtë orbitës së Tokës, duke filluar udhëtimin mbi 200 mijë milje (rreth 321868 kilometra) drejt Hënës, raporton bbc.

Artemis II ndodhet në një rrugë rrethore që do ta çojë ekuipazhin rreth anës së largët të Hënës dhe pastaj mbrapsht. Kjo është hera e parë që nga viti 1972 që njerëzit udhëtojnë jashtë orbitës së Tokës. Ekuipazhi pritet të kalojë anën e largët më 6 prill dhe të kthehet më 10 prill.

Pas djegies, astronautët ishin “të ngjitur pas dritareve”, duke kapur pamjet e jashtëzakonshme të Tokës dhe anës së errët të saj të ndriçuar nga Hëna. Wiseman më vonë pyeti edhe se si të pastrohen dritaret, pasi entuziazmi i tyre për hapësirën i kishte bërë të ndotura.

Një tjetër imazh tregon Tokën të ndarë nga dita dhe nata, ku kufiri midis dritës dhe errësirës njihet si terminatori. NASA publikoi edhe një foto tjetër ku Toka është thuajse e errët, me dritat elektrike të njerëzimit që shndrisin gjatë natës.