Klubi i madh turk, Galatasaray raportohet se po planifikon një nga lëvizjet më të bujshme të verës në tregun e transferimeve, duke synuar kapitenin e Manchester City, Bernardo Silva.

Sipas mediave turke, drejtuesit e klubit nga Stambolli janë të gatshëm t’i ofrojnë mesfushorit portugez një kontratë me pagë rreth 15 milionë euro në vit.

Raportohet se negociatat kanë hyrë tashmë në fazën e dytë dhe se gjatë muajit të ardhshëm priten bisedime direkte me përfaqësuesit e lojtarit.

Oferta e tillë do ta vendoste Galatasarayn përpara shumë klubeve evropiane që gjithashtu janë të interesuara për shërbimet e Silvës.

Mesfushori portugez po hyn në muajt e fundit të kontratës së tij me Manchester Cityn dhe deri më tani nuk ka një marrëveshje për rinovim, gjë që e bën atë një nga lojtarët më të kërkuar në tregun e transferimeve.

Gjatë nëntë viteve të tij në “Etihad”, Silva ka qenë një nga lojtarët më të besuar të trajnerit Pep Guardiola. Ai ka fituar gjashtë tituj në Premier League dhe një trofe në Ligën e Kampionëve, ndërsa ka zhvilluar mbi 440 ndeshje me fanellën e Cityt.

Nëse nuk arrihet një marrëveshje e re me klubin anglez, Silva mund të largohet si lojtar i lirë në verë, duke e bërë atë një nga objektivat më të mëdhenj të afatit kalimtar të verës që po vjen.