Presidenti i Shteteve të Bashkuara të Amerikës, Donald Trump, ka shprehur zhgënjim për negociatat me Iranin lidhur me programin e tij bërthamor, duke paralajmëruar se “ndonjëherë duhet përdorur forcë”.

Deklarata e tij erdhi pasi raundi i fundit i bisedimeve të enjten në Gjenevë përfundoi pa marrëveshje. Trump tha se Irani “nuk mund të ketë armë bërthamore” dhe se SHBA-ja nuk është e kënaqur me mënyrën si po zhvillohen negociatat, por shtoi se ende nuk ka marrë një vendim përfundimtar për përdorimin e forcës.

Irani ka mohuar se synon të zhvillojë armë bërthamore dhe ka kërkuar që çdo marrëveshje të përfshijë heqjen e sanksioneve amerikane.

Bisedimet në Gjenevë u zhvilluan mes të dërguarve amerikanë Steve Witkoff dhe Jared Kushner dhe zyrtarëve iranianë, me ndërmjetësimin e ministrit të Jashtëm të Omanit, Sayyid Badr Albusaidi, i cili tha se është arritur përparim i konsiderueshëm, megjithëse pa marrëveshje.

Në rajon ndodhet një forcë e madhe ushtarake amerikane, përfshirë dy grupe aeroplanmbajtësish, në pritje të vendimit të presidentit. Trump tha se SHBA-ja ka ushtrinë më të madhe në botë. “Do të doja të mos e përdorja, por ndonjëherë duhet”, u shpreh ai.

Departamenti i Shtetit njoftoi se sekretari i Shtetit, Marco Rubio, do të zhvillojë bisedime në Izrael me kryeministrin Benjamin Netanyahu më 1 dhe 2 mars.

Trump tha se gjatë ditës do të ketë edhe diskutime të tjera për Iranin, pa specifikuar me kë. /Reuters