Kuvendi i Kosovës do të mbajë sot seancën konstituive të legjislaturës së dhjetë. Seanca, e paraparë fillimisht të mbahej në ora 12:00, është shtyrë për në ora 17:00 për shkak të seancës në Hagë, ku mbrojtja e ish-krerëve të UÇK-së do të paraqesë deklaratën përfundimtare.

Në rend dite, fillimisht do të jetë formimi i Komisionit të përkohshëm për verifikimin e kuorumit dhe mandateve të deputetëve, pasuar nga betimi i deputetëve të rinj. Më pas do të procedohet me zgjedhjen e Kryetarit të Kuvendit dhe të nënkryetarëve.

Siç është bërë e ditur, është arritur dakordim që votimi i nënkryetarëve të bëhet në pako.

Seanca do të drejtohet nga deputeti më i vjetër, Avni Dehari (LVV), i ndihmuar nga deputetja më e re, Fatma Taçi (KDTP). Për zgjedhjen e kryetarit dhe nënkryetarëve nevojiten 61 vota nga gjithsej 120 deputetë.

Nga Lëvizja Vetëvendosje është paralajmëruar se do të respektohet vendimi i Gjykatës Kushtetuese lidhur me zgjedhjen e nënkryetarit nga radhët e komunitetit serb.

Nënkryetari i kësaj partie, njëherësh ish-kryetar i Kuvendit, Glauk Konjufca, ka deklaruar se pret që përveç konstituimit të Kuvendit, gjatë së mërkurës të formohet edhe Qeveria.

“Ne kurrë nuk i kemi refuzuar aktgjykimet e Gjykatës Kushtetuese. Deri tash vazhdimisht Lëvizja Vetëvendosje, ato natyrisht kanë qenë beteja politike, por kur i ka dhënë vulë Gjykata Kushtetuese siç ishte rasti për shembull në vitin 2014 kur tha që ju nuk mundeni me bë shumicën, shumicën duhet ta bëjë vetëm fituesi i zgjedhjeve, ne u tërhoqëm dhe vazhduam sipas opinionit të Gjykatës”, ka theksuar ai.