Ish-Prokurori i Përgjithshëm i Arizonës, Mark Brnovich, ka vdekur në moshën 59-vjeçare pas një ataku kardiak, raporton “ABC News”.

Në prill të vitit të kaluar, Presidenti amerikan, Donald Trump e nominoi Brnovich si ambasador në Serbi, por e tërhoqi nominimin e tij në tetor.

Ish-guvernatori republikan i Arizonës, Doug Ducey, tha se pasioni i Brnovich për ligjin, drejtësinë dhe viktimat ishte shenjë dalluese e karrierës së tij.

“Për ata prej nesh që patën fatin ta quanin mik, humori i tij, pozitiviteti dhe shpirti luftarak ishin ngjitës. U prehtë në paq” shkroi Ducey në platformën sociale X.

Brnovich, republikan, ishte në mandatin e tij të dytë si prokuror i përgjithshëm i Arizonës kur zyra e tij hetoi zgjedhjet e vitit 2020. Arizona ishte ndër shtetet që Joe Biden fitoi atë vit, duke ia mohuar Trumpit rizgjedhjen në presidencë.

Brnovich publikoi një raport të përkohshëm në prill të vitit 2022, i cili përshkruante shqetësimet e tij lidhur me disa procedura zgjedhore, por nuk ofronte prova për probleme madhore, pavarësisht gjashtë muajve hetim.

Në atë kohë, Brnovich po kërkonte nominimin republikan për një vend në Senatin e SHBA-së dhe po përballej me kritika të ashpra nga Trump, i cili pretendonte se ai nuk po bënte mjaftueshëm për të ndjekur penalisht “mashtrimet zgjedhore”. Brnovich kërkonte mbështetjen e Trumpit, por nuk e mori atë.

Kur prokurorja e përgjithshme aktuale, Kris Mayes, mori detyrën, ajo zbuloi se Brnovich kishte fshehur gjetje nga hetuesit e tij. Mayes tha se dokumentet tregonin se zgjedhjet e vitit 2020 “u zhvilluan në mënyrë të drejtë dhe të saktë nga zyrtarët zgjedhorë”.

Dokumentet që ajo publikoi treguan gjithashtu se Brnovich kishte mbajtur të fshehur një memorandum të veçantë që rrëzonte në mënyrë sistematike teoritë konspirative zgjedhore që u përhapën në të djathtën, përfshirë pretendimet për votues të vdekur ose të dyfishtë, fletëvotime të shënuara paraprakisht të sjella nga Azia, serverë zgjedhorë të lidhur me internetin dhe madje manipulim nga satelitë të kontrolluar nga ushtria italiane.