Komuna e Malishevës ka njoftuar se reshjet e dendura gjatë orëve të fundit kanë shkaktuar vështirësi në qarkullimin në disa rrugë, por situata e përgjithshme mbetet e menaxhueshme.

Sipas njoftimit, ekipet e Shërbimit të Zjarrfikësve dhe Shpëtimit, Policia e Kosovës dhe ekipet komunale janë në gatishmëri dhe po punojnë për të ndihmuar qytetarët.

Si pasojë e prurjeve të mëdha të ujërave, lumi Mirusha ka dalë nga shtrati, duke ndikuar në disa akse rrugore, përfshirë:

Rruga “Hamdi Berisha” në Malishevë

Transiti afër lagjes Hoti

Rruga Malishevë–Banjë

Rruga Mirushë–Gurbardh

Rruga Lubizhdë–Turjakë dhe ura në Lubizhdë

Një urë në lagjen e fshatit Damanek

Rruga për në fshatin Panorc, ku dy segmente kanë ujë në rrugë

Komuna njofton se furnizimi me energji elektrike po realizohet me reduktime në disa zona, ndërsa furnizimi me ujë është i rregullt, por për momentin uji nuk është i përdorshëm për shkak të ndotjes nga vërshimet e ditëve të kaluara.

Qytetarët luten të përdorin rrugët alternative, të mos tentojnë të kalojnë në rrugët e përmendura dhe të respektojnë sinjalistikën e vendosur nga Policia e Kosovës për ndalim të qarkullimit.