Kryetari i grupit parlamentar të Partisë Socialiste, Taulant Balla, ka njoftuar sot zyrtarisht se duke nisur nga muaji janar, punonjësit e Policisë së Shtetit do të përfitojnë një rritje të re pagash.

Deklarata u bë pas mbledhjes së grupit parlamentar socialist, ku në fokus ishin diskutimet për ndarjen e fondeve në vitin e ardhshëm.

Sipas Ballës, rritja nuk do të jetë selektive, por gjithëpërfshirëse, duke prekur çdo hallkë të zinxhirit komandues, nga niveli më i ulët deri te ai më i larti.

“Nga janari 2026, pagat bazë dhe shtesat për kushte pune e ushqim rriten në çdo nivel hierarkik, nga inspektori i thjeshtë deri te drejtuesit e lartë,” sqaroi Balla përmes një postimi në rrjetet sociale.

Ky ndryshim përfshin jo vetëm rrogën neto, por edhe trajtimin financiar për vështirësitë e punës dhe dietat ushqimore, duke synuar një përmirësim të ndjeshëm të paketës financiare për efektivët.

Kreu i grupit të PS dha edhe një shembull konkret të nivelit të pagave që do të arrihet me buxhetin e ri. “Paga mesatare për drejtuesit e parë do të shkojë deri në 171,500 lekë,” bëri me dije ai.

Balla e cilësoi këtë vendim si një tjetër hap strategjik në mbështetje të forcave të rendit dhe sigurisë publike, duke rikonfirmuar angazhimin e qeverisë për të rritur në vazhdimësi mirëqenien e punonjësve të policisë./rtsh