Ministrja në detyrë e Drejtësisë, Albulena Haxhiu ka thënë se sot të gjithë po e shohin atë të cilën e ka paralajmëruar ndër vite, që KPK është e kapur nga grupe interesi.

Me anë të një postimi në Facebook, Haxhiu tha reforma në Këshillin Prokurorial të Kosovës pritet të jetësohet në janar 2026, transmeton Arbresh.info.

Ndër të tjera, Haxhiu theksoi se kjo reform shumicës së anëtarëve të KPK-së u ka penguar që nga dita e parë.

Postimi i plotë:

Sot të gjithë po e shohin qartë atë për të cilën kemi paralajmëruar ndër vite. KPK prej kohësh është e kapur nga grupe interesi që nuk e kanë prioritet përmirësimin e sistemit prokurorial, por mbrojtjen e interesave të tyre dhe të individëve jashtë Këshillit.

Ky është një realitet i hidhur, por i pamohueshëm.

Reforma në KPK pritet të jetësohet në janar 2026, dhe ky është një hap i domosdoshëm për rikthimin e integritetit në institucion.

Që nga viti 2021, kur kemi nisur reformat në drejtësi, synimi ka qenë i qartë, heqja e kontrollit të një rrethi të ngushtë njerëzish, rritja e transparencës dhe llogaridhënies, eliminimi i ndikimit të grupeve të interesit që e kanë përdorur institucionin për interesa personale e grupore, forcimi i meritokracisë mbi lidhjet apo klanet, dhe krijimi i një institucioni që funksionon në shërbim të publikut, jo të individëve të privilegjuar.

Shumicës së anëtarëve aktualë të KPK-së kjo reformë u ka penguar që nga dita e parë. Ata kanë përdorur çdo mjet të mundshëm për ta bllokuar, por nuk ia dolën dhe nuk do t’ia dalin, sepse drejtësia dhe interesi publik nuk mund të ndalen nga grupe të izoluara interesi./Arbresh.info