Tani kur po afrohet edhe përvjetori i tetë i shpalljes së Pavarësisë së Kosovës, zëvendëskryeministri i Republikës së Kosovës, njëherësh edhe ministri i punëve të jashtme, Hashim Thaçi, përmes një postimi në rrjetin e tij social ka ftuar qytetarët e Kosovës që në foton kopertinës të profilit facebook të vendosin foton të cilën e ka vendosur ai vetë në profilin e tij.

Derisa opozita në këtë datë ka paralajmëruar protestë, Thaçi ka shkruar se shpallja e pavarësisë me 17 shkurt të vitit 2008 ishte kurorëzimi i një rruge të mundimshme, me përpjekje dhe sakrifica, duke ftuar qytetarët që për nder të atyre që kanë punuar dhe luftuar për ditët e lirisë dhe pavarësisë të festojnë së bashku ditën siç e quajti ai papërsëritshme të historisë së popullit.

Postimi i plotë i zëvendëskryeministrit, Hashim Thaçi:

Të nderuar miq, përvjetori i 8-të i Pavarësisë së Republikës së Kosovës është duke u afruar prandaj unë ju ftoj të vendosni edhe ju këtë cover festiv në faqen tuaj të Facebook-ut. Shpallja e Pavarësisë më 17 shkurt 2008 ishte kurorëzimi i një rruge të mundimshme plot përpjekje dhe sakrifica prandaj në nderim të gjithë atyre brezave që kanë ëndërruar, punuar dhe luftuar për ditët e lirisë dhe pavarësisë që gëzojmë sot ju ftoj që ta festojmë të gjithë së bashku këtë ditë të papërsëritshme të historisë së popullit tonë. HTH