Në Oakland, Kaliforni, muzikantë të pavarur dhe dashamirës të muzikës organizuan një seri diskutimesh me titullin “Death to Spotify”, ku u trajtua ndikimi i platformave ‘streaming’ si Spotify në mënyrën se si prodhohet dhe dëgjohet muzikë.

Takimi u mbajtën në bibliotekën Bathers dhe përfshiu përfaqësues nga radioja indie KEXP, label-e të pavarura dhe kolektive DJ-sh, duke tërhequr interes edhe nga vende si Barcelona e Bengaluru.

Qëllimi i këtyre bisedave ishte të sfidohej dominimi i algoritmeve dhe modeleve kapitaliste që, sipas pjesëmarrësve, po dëmtojnë industrinë muzikore. Kritikat kryesore ishin ndaj mënyrës se si Spotify paguan artistët dhe promovon muzikën e njëjtë, të përshtatshme për sfond, duke e bërë dëgjuesin një konsumator pasiv.

Gjithashtu, investimet e bashkëthemeluesit të Spotify, Daniel Ek, në teknologji ushtarake, shkaktuan reagime të forta dhe bojkote nga disa grupe muzikore si Massive Attack dhe King Gizzard & the Lizard Wizard.

Organizatorët e “Death to Spotify”, mes tyre Stephanie Dukich dhe Manasa Karthikeyan, inkurajuan një reflektim më të thellë mbi marrëdhënien me muzikën dhe sfiduan dëgjuesit dhe artistët të largohen nga platforma, duke eksploruar mënyra alternative si Bandcamp, vinyl dhe evente livestream. Ata theksuan se përgjegjësia nuk bie vetëm mbi artistët, por edhe mbi dëgjuesit, që duhet të pranojnë mungesën e aksesit të menjëhershëm ndaj gjithë muzikës si një zgjedhje të vetëdijshme.

Edhe pse disa artistë të mëdhenj si Taylor Swift dhe Thom Yorke kanë bojkotuar Spotify në të kaluarën, ata janë rikthyer pas një farë kohe. Megjithatë, sipas profesorëve dhe muzikantëve të pavarur, kjo valë e re bojkotesh është ndryshe, pasi përfshin artistë më pak të njohur që po kërkojnë alternativa më të drejta dhe më të pavarura për shpërndarjen e muzikës së tyre.

Grupi aktivist UMAW mbështet këtë lëvizje dhe nxit veprime kolektive për të mbrojtur të drejtat e muzikantëve, përfshirë fushata për rregullime më të mira ligjore dhe presion ndaj festivaleve për të mos pranuar sponsorizime nga industria e armëve.

Në fund, organizatorët theksojnë se qëllimi nuk është mbyllja e Spotify-së, por ndërgjegjësimi i mënyrës se si dëgjojmë muzikë në një epokë ku algoritmet mund të rrëmbejnë diversitetin kulturor dhe kreativitetin artistik./tvklan.al