Dogana e Kosovës kap mallra të padeklaruara në Aeroportin e Prishtinës

16:00 | 26 Shtator 2025
R J

Dogana e Kosovës ka njoftuar për një rast të shmangies së detyrimeve doganore, i zbuluar gjatë kontrollit në Zyrën Doganore në Aeroportin e Prishtinës.

Gjatë procedurave të kontrollit doganor, zyrtarët kanë gjetur mallra të padeklaruara dhe të deklaruara në mënyrë të pasaktë, të paraqitura për zhdoganim në një deklaratë importi. Pas ekzaminimit të detajuar fizik, u zbulua se përveç mallit të deklaruar, ishin të fshehura edhe 4 instrumente për automjete, si dhe një pjesë e mallit ishte deklaruar gabimisht, duke u emërtuar ndryshe nga gjendja reale.

Sipas vlerësimit të Doganës, baza doganore e mallit të zbuluar arrinte në 3,289 euro, ndërsa shmangia e taksave kapte vlerën prej 980.12 euro.

Rasti është proceduar sipas legjislacionit në fuqi, ndërsa Dogana e Kosovës thekson se mbetet e përkushtuar në luftimin e çdo tentative për shmangie fiskale dhe mbrojtjen e tregut të brendshëm, duke garantuar zbatimin e ligjit dhe transparencë në të gjitha proceset doganore.