Gardiani italian, Gianluigi Donnarumma, u largua nga Paris Siant-Germaini pas një vendimi të trajnerit Luis Enrique.

Ai u transferua drejt Manchester City në ditën e fundit të merkatos për shumën e 30 milionë eurove, shkruan Arbresh.info.

Ky largim bëri bujë të madhe në Francë dhe më gjerë, ku u komentua shumë. Ditëve të fundit edhe drejtori sportiv i Parisit, Luis Campos, dha arsyen e largimit të italianit.

Ai në një intervistë për “RMC” tha se ishin shumë rrethana që sollën largimin e Donnarummas.

Campos ka lënë të kuptohet se paga e lartë që e ka kërkuar Donnarumma është prej arsyeve kryesore pse ai u largua.

“Klubi është më i rëndësishëm se kushdo. Kjo ka ndryshuar te PSG-ja. Rasti i Donnarummas ishte një sërë rrethanash që sollën këtë vendim, pasi ai kërkoi një pagë në nivelin e PSG-së së vjetër, jo atë aktual. Politika e pagave vlen për të gjithë. Stabiliteti i klubit nuk do të ndryshojë për shkak të një lojtari që dëshiron të jetë ndryshe. Ne do ta mbrojmë PSG-në. Ne gjithmonë duam të luajmë mirë dhe të fitojmë ndeshje”, ka thënë Campos.

Portieri 26-vjeçar menjëherë ka gjetur veten tek City nën urdherat e Guardiolës, teksa debutimin e bëri në ndeshje me Man United, ku pati performancë të shkëlqyer./Arbresh.info