Komandanti i KFOR-it, gjeneral major Enrico Barduani, priti sot të dërguarin special për Ballkanin Perëndimor, René Troccaz, bashkë me ambasadorin francez në Kosovë, Olivier Guérot.

Takimi u mbajt në shtabin e KFOR-it në kampin “Film City”, në Prishtinë.

Në njoftim thuhet se takimi i dha gjeneralit Barduani një mundësi për të theksuar angazhimin e vazhdueshëm të KFOR-it për një mjedis të sigurt për të gjitha komunitetet në Kosovë dhe për të shkëmbyer pikëpamje mbi zhvillimet aktuale në rajon.

Gjatë takimit, Barduani falënderoi Troccaz për kontributin e Francës në KFOR dhe për paqen dhe stabilitetin në rajon.

“KFOR-i vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt për të gjithë njerëzit dhe komunitetet që jetojnë në Kosovë dhe lirinë e lëvizjes, në çdo kohë dhe në mënyrë të paanshme.

KFOR-i punon në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX) në rolet e tyre përkatëse si reagues të sigurisë” thuhet në njoftim të KFOR-it.