Sjellja e tifozëve në stadiumet e futbollit në Angli po përmirësohet në mënyrë të qëndrueshme, tregojnë statistikat e reja, por një klub ka marrë titullin e padëshiruar të të pasurit tifozët më problematikë.

West Ham ishin shkelësit më të mëdhenj vitin e kaluar, por përmirësuan rekordin e tyre gjatë 12 muajve të fundit me vetëm 77 arrestime, krahasuar me 103 një vit më parë.

Në total, numri i arrestimeve të lidhura me futbollin në ndeshjet në Angli dhe Uells ishte 1,932, një rënie prej 11 për qind nga viti i kaluar.

Nga këto, shumica (1,803) ndodhën në ndeshjet e gjashtë niveleve më të larta të futbollit anglez.

Megjithatë, disa klube shënuan një rritje, me një klub të ri që kaloi West Ham për numrin më të lartë të arrestimeve, me plot 121 raste, 27 më shumë se klubi në vendin e dytë.

Në krye të listës ndodhet Manchester United, që sipas Daily Mail regjistroi 121 arrestime në ndeshjet e tyre, përfshirë 34 për dhunë dhe prishje të rendit publik, ndërsa 27 tifozë u arrestuan për hyrje ose praninë në stadium me lëndë narkotike të klasit A.

Pas United vjen rivali lokal, Manchester City, me 94 arrestime, nga të cilat 43 për prishje të rendit dhe 15 për posedim të lëndëve narkotike të klasit A.

West Ham renditet i treti me 77 arrestime, nga të cilat 28 për prishje të rendit publik. Chelsea ndjek menjëherë pas me 76 arrestime.

Klubet e tjera me numër të lartë arrestimesh për posedim të drogës së klasit A janë: Newcastle (24), Liverpool (18), Everton (14) dhe Leeds (13).

Ky është viti i parë që nga pandemia e COVID-19, kur tifozët ishin të ndaluar në stadiume, që shifrat e arrestimeve kanë rënë nga viti në vit.

Në vend të gjashtë për nga numri total i arrestimeve renditet Aston Villa (71), e ndjekur nga Everton (56), Liverpool (45) dhe Arsenal (42)./Telegrafi/