Ambasada britanike në Kosovë ka njoftuar për takimet e të Dërguarës së Posaçme të Mbretërisë së Bashkuar në Ballkanin Perëndimor, Karen Pierce, me liderët e partive politike gjatë vizitës së saj zyrtare në Kosovë.

Ambasada shpalosi kërkesat që Pierce ia ka bërë atyre për formim të qeverisë e për përmbushje të premtimit të shtetit multietnik, si dhe diskutimet për përgatitjen e samitit të Procesit të Berlinit.

“Gjatë vizitës së saj në Kosovë, Dame Karen Pierce, e Dërguara e Posaçme e Mbretërisë së Bashkuar në Ballkanin Perëndimor, u takua me krerët e partive politike Vetëvendosje, PDK, LDK dhe AAK për të diskutuar për Samitin e Procesit të Berlinit që do të organizohet nga Mbretëria e Bashkuar në tetor. Ajo diskutoi rëndësinë e formimit urgjent të një qeverie që mund të promovojë interesat e të gjithë qytetarëve të Kosovës. Ajo theksoi nevojën për përmbushje të prekshme të premtimit të Kosovës si një shtet shumetnik dhe kërkoi angazhim të vazhdueshëm në dialogun e lehtësuar nga BE-ja”, tha ambasada.

Pierce gjithashtu u takua me Komandantin e misionit të udhëhequr nga NATO, KFOR, Enrico Barduani, me të cilin ajo përsëriti mbështetjen e Mbretërisë së Bashkuar për KFOR-in dhe njohu rolin e tij thelbësor në ruajtjen e sigurisë.