Presidenti francez Emmanuel Macron reagoi pas sulmit iranian ndaj bazave ushtarake amerikane në Katar, duke bërë thirrje për ulje të menjëhershme të tensioneve në rajon.

Në një postim në platformën X, Macron shprehu solidaritetin e Francës me Katarin dhe kërkoi kthimin në tryezën e bisedimeve.

“Shpreh solidaritetin e Francës me Katarin, i cili u godit nga Irani në tokën e tij. Jam në kontakt të ngushtë me autoritetet e vendit dhe partnerët tanë në rajon,” shkroi Macron.

Ai theksoi nevojën për përmbajtje maksimale nga të gjitha palët e përfshira në konflikt.

“U bëj thirrje të gjitha palëve të ushtrojnë përmbajtje maksimale, të ulin tensionet dhe të kthehen në tryezën e negociatave. Kjo spirale kaosi duhet të marrë fund,” theksoi kreu i Elizesë.

Deklarata e Macron vjen në një moment të rrezikshëm për stabilitetin në Lindjen e Mesme, ndërsa rritet frika për përshkallëzim të mëtejshëm mes Iranit dhe aleatëve të SHBA-së në rajon.