Kryetari i Listës Serbe, Zllatan Elek, është ftuar nga Prokuroria Speciale e Republikës së Kosovës (PSRK) për t’u intervistuar në lidhje me ngjarjet në veri të vendit gjatë vitit 2022, konkretisht protestat dhe vendosjen e barrikadave.

Sipas burimeve të mediave në veri, intervistimi është planifikuar të mbahet nesër (e mërkurë) në orën 13:30.

Lajmi është konfirmuar edhe nga drejtori i Zyrës për Kosovën në Qeverinë e Serbisë, Petar Petkoviq, pas një takimi në Bruksel.

Petkoviq ka deklaruar se ftesa të ngjashme u janë dërguar edhe zyrtarëve të tjerë të Listës Serbe, përfshirë Igor Simiqin, të cilët po hetohen për akuza të ndërlidhura me veprat penale, përfshirë terrorizmin.

Megjithatë, përmes një njoftimi të publikuar nga media lokale “Kossev”, Lista Serbe ka konfirmuar se Zllatan Elek do t’i përgjigjet ftesës dhe do të paraqitet për intervistim.

Arbresh.info ka kërkuar një përgjigje nga Prokuroria Speciale dhe është në pritje të saj.