Oda Ekonomike e Kosovës, Oda Ekonomike Amerikane, Oda Ekonomike Gjermano-Kosovare, Klubi i Biznesit dhe Dhoma e Tregtisë dhe Industrisë në takimin me bizneset që preken nga vendimi i Zyrës së Rregullatorit për Energji për liberalizimin e tregut të energjisë, kërkuan anulimin e këtij vendimi.

Me këtë rast, ky vendim u quajt i papërballueshëm dhe që rrezikon qëndrueshmërinë financiare të shumë ndërmarrjeve. Siç u tha, nëse kërkesa për anulim nuk merret parasysh, si zgjidhje shihet subvencionimi i kostos shtesë për bizneset. Në të kundërtën, paralajmëruan shprehjen e pakënaqësisë në forma të tjera, pa përjashtuar mundësinë e protestave.

Kryetari i Odës Ekonomike të Kosovës, Lulzim Rafuna, kundërshtoi tregun e hapur të energjisë në këtë fazë, duke vënë theksin te pasojat për bizneset.

“Bizneset nuk janë përgatitur për një treg të lirë të energjisë”, tha Rafuna.

Drejtori i Klubit të Biznesit, Ilir Ibrahimi tha se bizneset nuk e kanë pasur kohën e duhur për t’u përgatitur që të përballemi me tregun e lirë të energjisë.

“Ky është vendim i rëndë të cilit asnjë biznes nuk mund t’i mbijetojë”, tha Ibrahimi.

Edhe kryetari i Shoqatës së Prodhuesve Kosovarë, Kushtrim Ajvazi, e pa të paarsyeshëm vendimin e ZRRE-së për liberalizimin e tregut të energjisë për bizneset.

“Kërkesa e parë është shtyrja e hyrjes në fuqi të vendimit të ZRrE-së për së paku një vit, derisa kërkesa e dytë është kërkesa për subvencionim të kësaj kostoje shtesë për prodhuesit”, tha Ajvazi.

Në këtë takim morën pjesë edhe përfaqësues të shumë bizneseve. Emërues i përbashkët i diskutimeve të tyre ishte kërkesa për anulim të vendimit të ZRrE-së për liberalizim të tregut energjetik për 1300 biznese.

Zyra e Rregullatorit për Energji ka njoftuar se nga 1 qershori bizneset që kanë mbi 50 të punësuar ose qarkullim mbi 10 milionë euro do të dalin në tregun e lirë të energjisë elektrike.