Grupi për Studime Juridike dhe Politike (GLPS) ka paralajmëruar për pasoja serioze nga dështimi i krijimit të institucioneve funksionale në Kosovë, duke vënë theksin në ndikimin negativ në procesin e integrimit evropian.

Sipas GLPS-së, vendi ka hyrë në muajin e dytë pa një qeveri dhe kuvend funksional, gjë që po ndikon jo vetëm në qeverisjen e përditshme, por edhe në ngecjen e një prej dokumenteve më të rëndësishme strategjike për integrimin – Agjendës së Reformave Evropiane

“Grupi për Studime Juridike dhe Politike (GLPS) vlerëson se dështimi i krijimit të një kuvendi dhe të një qeverie funksionale tash e dy muaj, ndikon negativisht në të gjitha fushat e qeverisjes, por sot duam të tërheqim vëmendje në rrafshin e integrimit Evropian. Në pamundësi objektive për hapjen e negociatave për anëtarësim, prioriteti i Kosovës në fushën e integrimit Evropian duhet të jetë Agjenda e Reformave e vendit, që është miratuar nga Komisioni Evropian në tetor 2024 dhe është dorëzuar për ratifikim në Kuvend më 4 dhjetor”, thanë ata.

GLPS tha se vendi mund të përfitojë deri në 883 milion euro nga kjo agjendë në një periudhë tre vjeçare, një ngritje substanciale nga vitet e kaluara.

“GLPS dëshiron të rikujtojë se vendi ynë mund të përfitojë deri në 883 milionë euro nga kjo Agjendë në një periudhë tre-vjeçare, një ngritje substanciale nga viti e kaluar. Ndërkaq, në momentin e ratifikimit, Komisioni Evropian është zotuar të ekzekutojë një parapagesë në vlerën prej 7% apo 61 milionë euro. Këto shifra janë shumë serioze për një vend me ekonominë e Kosovës”, thanë tutje ata./Arbresh.info