Paneli Zgjedhor për Ankesa dhe Parashtresa ka vazhduar të gjobitë subjektet politike për shkelje të Kodit të Mirësjelljes për Subjektet Politike, Mbështetësit e tyre dhe Kandidatët.

Paneli Zgjedhor për Ankesa dhe Parashtresa ka gjobitur Lëvizjen Vetëvendosje me 30 mijë e 500 euro për shkelje të Kodit të Mirësjelljes për Subjektet Politike, Mbështetësit e tyre dhe Kandidatët.

Gjashtë ankesa i ka parashtruar Partia Demokratike e Kosovës kundër VV-së dhe PZAP-ja i ka aprovuar të gjashtat. Ndërsa, njëra ankesë është bërë nga Instituti i Kosovës për Drejtësi për shkak të pjesëmarrjes së fëmijëve në fushatë.

Në një prej ankesave që LDK-ja e ka parashtruar kundër VV-së, kjo e fundit u gjobit me 3 mijë euro dhe PZAP e ka urdhëruar kandidatin e VV-së, Dimal Basha, që ta largojë nga Facebooku postimin me titull “Oferta e 9 shkurtit e përmbledhur në një foto” – një foto ku paraqitet ish-kryeministri Avdullah Hoti me presidentin serb.

Lidhja Demokratike e Kosovës është gjobitur për shkelje të Kodit të Mirësjelljes me 5 mijë euro, pas dy ankesave të LVV-së kundër saj.

Kurse, Koalicioni për Familje u gjobit me 5 mijë e 500 euro, pas ankesës së organizatës Qendra për Barazi dhe Liri dhe Dylberizmi, për shkak të gjuhës nxitëse dhe stigmatizuese ndaj komunitetit LGBTI+.

Po ashtu, është gjobitur subjekti “Srpska Demokratija” me 4 mijë e 500 euro. Ankesa është bërë nga LVV-ja.

PZAP-ja ka gjobitur edhe Listën Serbe me 4 mijë euro. Ankesa është bërë nga subjekti politik, ‘Për liri, drejtësi dhe mbijetesë’./rtk