Sekretari i Përgjithshëm i Partisë Socialiste në Shqipëri, Blendi Klosi dhe kreu i grupit parlamentar socialist Niko Peleshi janë takuar këtë të hënë me presidentin Bajram Begaj në kuadër të propozimit të një date për zgjedhjet e përgjithshme parlamentare që do të mbahen pranverën e vitit të ardhshëm.

PS ka propozuar datën 11 maj për mbajtjen e zgjedhjeve të 2025-ës. Lajmi u bë me dije nga vetë Klosi pas takimit me Begajn.

“Propozuam datën 11 maj. T’ju lemë më shumë kohë emigrantëve”, deklaroi Klosi.

Kujtojmë se partitë e vogla kanë propozuar datën 4 maj për mbajtjen e zgjedhjeve, ndërsa kanë deklaruar se nëse Presidenti do të pranonte datën 11 maj, do të ishte favorizim për mazhorancën. Kjo pasi sipas tyre, më 9 maj do të mbahet në Tiranë, Samiti i Komitetit politik Europian dhe mbajtja e zgjedhjeve dy ditë pas mbërritjes së liderëve botërorë në kryeqytet, mund të ndikojë si avantazh për socialistët në zgjedhje.

Sakaq, Partia Demokratike nuk ka pranuar që të takohet ditën e sotme me kreun e shtetit për propozimin e një date nga ana e tyre, për zgjedhjet.

Ndërkaq, edhe kreu i Komisionit Qendror të Zgjedhjeve po zhvillon një takim me Begajn në ambientet e Presidencës.

/rtsh.al/