Një 32-vjeçar është arrestuar nga policia pasi ka plagosur aksidentalisht 3 persona.

Blutë e kryeqytetit bëjnë me dije se më 23 korrik në rrugën e Kavajës, 32-vjeçari Edison Elezaj, djali i biznesmenit Hajri Elezaj ka shkrepur në mënyrë të pavullnetshme armën e zjarrit dhe për pasojë 3 persona mbetën të plagosur.

Po ashtu, ndaj 32-vjeçarit më 26 korrik Gjykata e Shkallës së Parë ka caktuar masën e sigurimit personal “Arrest në burg” në mungesë, për vepren penale “Mbajtja pa leje dhe prodhimi i armëve, armëve shpërthyese dhe i municionit”.

“Shërbimet e Sektorit për Operacionet Speciale dhe Kërkimin, Sektorit të Forcës së Posaçme “Shqiponja” në DVP Tiranë në bashkëpunim me DVP Kukës, në vijim të punës për lokalizimin, kapjen dhe vënien përpara përgjegjësisë penale të shtetasve të shpallur në kërkim, bazuar në informacionet e siguruara në rrugë operative, për vendndodhjen e një shtetasi të shpallur në kërkim për armëmbajtje pa leje, organizuan dhe finalizuan operacionin policor të koduar “Oda”. Si rezultat i këtij operacioni, në një hotel në Kukës, është lokalizuar dhe arrestuar shtetasi E. E., 32 vjeç.

Gjykata e Shkallës së Parë të Juridiksionit të Përgjithshëm Tiranë, me vendimin nr.1897 datë 26.07.2024, i ka caktuar masën e sigurimit personal “Arrest në burg” në mungesë, për vepren penale “Mbajtja pa leje dhe prodhimi i armëve, armëve shpërthyese dhe i municionit” parashikuar nga neni 278/1 i Kodit Penal”, thuhet në njoftim./rtsh.al/