Nga tash e tutje autoambulancat e spitaleve private, automjetet për bartjen e kufomave dhe veturave të taksive, nuk do t’u lejohet të qëndrojnë në oborrin e Qendrës Klinike Universitare të Kosovës (QKUK).

Kështu ka bërë të ditur vetë QKUK përmes njoftimit të Shërbimit Spitalor Klinik Universitar të Kosovës (SHSKUK), raporton Arbresh.info.

Ky vendim sipas njoftimit, është marrë për të përmirësuar efikasitetin e shërbimeve emergjente dhe për të liruar parkingun i QKUK-së për pacientë.

“Qendra Klinike Universitare të Kosovës, njofton publikun se, në përputhje me masat për menaxhimin dhe organizimin e hapësirave në QKUK; autoambulancat e spitaleve private, automjetet për bartjen e kufomave dhe veturave të taksive, nuk do t’u lejohet të qëndrojnë në oborrin e QKUK-së. Ky vendim është marrë për të përmirësuar efikasitetin e shërbimeve emergjente dhe për të lehtësuar lëvizjen dhe qarkullimin brenda oborrit të Qendrës Klinike Universitarë të Kosovës, me ç ‘rast të lirohet parkingu i QKUK-së, për pacientë”, thuhet në njoftim.

Po ashtu, QKUK bën të ditur se kjo masë është e nevojshme për të siguruar që hapësira dhe parkingu i QKUK-së, të jetë i dedikuar për emergjencat dhe pacientët që kanë nevojë për shërbime të menjëhershme, si dhe për të përmirësuar cilësinë e shërbimeve mjekësore për të gjithë qytetarët./Arbresh.info/