Për 5 ditë rresht, në Prishtinë, u mbajtën ndeshje përplot emocion e festë e cila kulmoi me fitoren e ekipit të Kosovës. Dardanet në finale triumfuan ndaj Azerbajxhanit me rezultat 75:65.

Në sfidën për vendin e tretë, Shqipëria triumfoi ndaj Qipros 70:55, duke dominuar gjatë gjithë ndeshjes dhe duke fituar medaljen e bronztë, transmeton Arbresh.info.

Në takimin për vendin 5-7, Gjeorgjia mundi Maltën 61:56, duke u renditur e pesta, derisa maltezet u renditën në vendin e gjashtë, kurse e fundit ishte Armenia.

Në fillim të ceremonisë, sekretarja e përgjithshme e FBK-së, Elvira Dushku ka pranuar çmimin për organizim, çmim që iu nda nga Edwin Yeats, komisioner i FIBA-s.

Dushku ka ndarë çmimin MVP, që iu nda kapitenes së Shqipërisë, Luna Luca. Sekretarja e përgjithshme së bashku me zëvendës sekretarin e përgjithshëm të FBK-së, Adriatik Rraci kanë ndarë çmimet për Top 5, ku ishin: Dimitra Eftychiou e Qipros, Martina Haxhiu e Shqipërisë, Silan Akbingol e Azerbajxhanit, Flutra Mehmeti e Kosovës dhe Angelina Ismayilova e Azerbajxhanit.

MVP e kampionatit është shpallur Flutra Mehmeti e Kosovës, çmim që u nda nga kryetari i FBK-së, Arben Fetahu.

Në fund, trofeu i kampionit iu nda kapitenes së Kosovës, Malvina Haziri nga John Gonzalves, president i FIBA Small Countries dhe anëtar i Bordit të FIBA Evropës. /Arbresh.info